La rantré l’arivé. Ti-Loui la pa guingn in plass dan lintèrna. Li laté oblizé arès sanm son papa dan la sosiété shinoi, dan lo dézord, anparmi tousak té i ador zoué domino-matiok toultan.
Dan son klass, li la rotrouv lé kat zot marmay ke té i sorte Sin-Bnoi konm li. Sink zélèv an tou, si dé klass troizièm, sétadir si soisante-diss zène-zan, zène-fiy apepré. Sink solman la niabou rante lisé. Té i vé pa dir lé zot té pa kapab suiv in klass sogonn, mé lavé poin la plass pou toulmoun. Ladministrasion lisé té i désid : tan-d plass pou kour konplémantèr Sin-Bnoi, tan-d plass pou kour konplémantèr Sint-André éinsidsuite… Tousa parske plass an sogonn lété dabor rézèrvé pou bann zélèv lisé mèm, bann marmay té là dopi klass sizièm, sankoi dopi névièm. E bann zélèv-là lété pa ninportaki : lété zanfan gro vaza. Zot shemin lété galizé ziska basho san problèm. Tandiss, dan lé kartié, bon-bon zélèv té i rès kalé an troizièm pandan dé z-an, troi z-an nadéfoi.